မာꩻသုတေသနအရန်းရန်း

နီကအီႏမာꩻသွူသုတေသနတဗာႏဗာႏယို လွေꩻနေးဒျာႏတွမ်ႏအချက်အဗာႏ အရန်းရန်းဖုံႏသွူ။နုဲင်းသုတေသနထာꩻမာꩻရဲဉ်ႏဒိုင်ယာဂရမ်နောဝ်ꩻတဲ့ အရန်းနောဝ်ꩻ အဝ်ႏလစ်ꩻမျိုꩻတဲင် တမျိုꩻတမျိုꩻစီႏတဲ့ ဝွေꩻသီးသျင်ꩻပျꩻဖေႏဒျာႏသွူ။ နံပါတ်တာအနေႏတဲ့ ကအီႏလင်ꩻရီဒါႏ ခင်ႏလမ်းတထွောင်းထွောင်းယို သုတေသနငေါဝ်းရီယို ဖျင်ဆင်ခါꩻရီးရီးထွူတဲင် နုဲင်းငေါဝ်းရီအကို ထင်ႏထိုပြွူႏဖြိုမုအီထွာနေဟောင်း။ယူႏယင်းတဖဲ့ꩻတဲ့ ဒုံသားတွမ်ႏသုတေသနသားအခါႏ အကျိုꩻထွာအီႏငါႏ ငေါဝ်းရီ မျိုꩻဖုံႏယို မိဉ်ႏထွာနောဝ်ꩻစားနောဝ်ꩻ အယံသွတ်ꩻတဲ့ ဝွေꩻသီးတဲမ်းခါꩻနောဝ်ꩻစားသွူ။

သုတေသနထာꩻမာꩻရဲဉ်ႏ

သုတေသနထာꩻမာꩻရဲဉ်ႏနောဝ်ꩻ ထွာဒျာႏအကျောင်ꩻခရာႏတဗာႏဗာႏတွမ်ႏအရန်းရန်းဖုံႏတဲင် ယိုဖုံႏနောဝ်ꩻ ထွာဒျာႏအွဉ်ႏနယ်ဖေႏသုတေသနသားဒျာႏသွူ။တဗွိုန်တောဝ်းလို့ဝင်ꩻအစွိုꩻဖုံႏတဲင် ကထောင်ထွားထွုမ်ႏဒါႏအခင်ႏလမ်းကွင်ꩻဖုံႏတဲ့ ဆေ့ဆေ့အာအာတဲ့ အကွာႏတန်နေနေသွူ။နောဝ်ꩻစားတဲင်တွော့ ကိဉ်းအာအာသွတ်ꩻတဲ့ အဆုဲင်ꩻသွတ်ꩻနောဝ်ꩻ ဗွိုန်ယင်းဒျာႏဝင်ꩻသွူ။ဥပမာႏတဲ့ လင်ꩻလယ်ႏထွားဒုံတဒုံအကို ခြွိုင်းသန်ꩻရေꩻဖုံႏ၊ပညာႏရေꩻဖုံႏ၊လမ်းငင်းအဗာႏဖုံႏယို ဆင်ႏပြေႏတသွိုန်တွောင်းနုဲင်းဒုံလင်ဖုံႏ အောဝ်ႏနေဟောင်း။ ကထွိုင်ႏထွုမ်ႏမာꩻနုဲင်းယိုစားတဲင် သုတေသနထာꩻမာꩻရဲဉ်ႏဒျာႏနေနေသွူ။

မာꩻသုတေသနအရန်း (၂)

အမုဲင်တာအကို ငေါဝ်းရီသုတေသနနောဝ်ꩻ သေႏချာႏသွတ်ꩻတဗာႏ မိဉ်ႏထွာလဲဉ်းတဲ့ နီကထွုမ်ႏထောင်ထွားဒါႏ သတင်ꩻအချက်အဗာႏဖုံႏယို တိဉ်ႏကျထဲ့မဲဉ်ႏဗာႏတွမ်ႏ နီငေါဝ်းရီအလောင်းသွူ။ အချက်အဗာႏဖုံႏ မိဉ်ႏတိဉ်ႏကျမသနယ်နောႏ နီမိဉ်ႏဒင်ႏကီထင်ႏယင်း အစွိုꩻထိုကီအရန်းရန်းဖုံႏတဲင် တွမ်ႏနီလိုႏအပ်ချက်အလꩻဖုံႏယို ကလိုႏထဲင်းဒါႏအချက်အဗာႏတဲ့နောဝ်ꩻ၊ယထွောင်းထွောင်းအလွိုအပိုႏတလိုႏတောဝ်း မိဉ်ႏအဝ်ႏဒါႏနောဝ်ꩻ ထဲမ်ထဲင်းဖေႏယင်း၊နုတ်ချာဖေႏယင်းဖုံႏနောဝ်ꩻစားသွူ။

မာꩻသုတေသနအရန်း (၃)

နီအချက်အဗာႏဖုံႏယို တိဉ်ႏကျလဲဉ်းရိုꩻကီလဲ့နောဝ်ꩻ၊လိုꩻလင်ကဖေႏဒါႏအချက်အဗာႏဖုံႏတဲ့နောဝ်ꩻ မာꩻသုတေသနအရန်းယိုအလောင်း စဲစ်ဆေꩻပွုံႏမဲဉ်ႏဆွုမ်ႏဗာႏသွူ။ ခါးလားကဒါႏကီထင်ႏလဲ့ အလွယ်ꩻတရွို့ꩻရအဝ်ႏဒါႏ သꩻထာꩻယူႏမိဉ်ႏပေါႏနောဝ်ꩻ တလဲင်ႏချင်ꩻတဲ့ လိုႏစဲစ်ဆေꩻချာမွိုင်ကြွိုင်ငါႏသွူ။ဥပမာႏဗွိုန်ဒျာႏ နီကဖြေႏဒါႏလိတ်အတန်ꩻကျောင်ꩻခိန်ႏနောဝ်စားတဲင် ဖြေႏထွူလဲဉ်းရိုꩻကီလဲ့ မဲ့ခွုံႏမုဲင်၊နံပါတ်ဖုံႏ၊ပုစ္ဆာႏငေါဝ်းရီဖုံႏ အမာႏအဝ်ႏဒါႏနေနေတဲင် ဆရာႏဖုံႏကပွေါးနီသားနောဝ်ꩻ ထွဉ်ႏစဲစ်ဆေꩻချာဗာႏ အခရာႏနောဝ်ꩻစားဒျာႏသွူ။ နုဲင်းမာꩻသုတေသနသားတဲ့နောဝ်ꩻ မိဉ်ႏစဲစ်ဆေꩻချာခွိုꩻခွိုꩻတဲ့ အမာႏတဲ့ယိန်းဆေ့ꩻဆေ့ꩻသွူ။

မာꩻသုတေသနအရန်း (၄)

အွိုးအရန်းသွံရန်းအကို နီသေႏချာႏတဗာႏ မိဉ်ႏမာꩻခါꩻထွူလဲဉ်းတဲ့နောႏ အဝ်ႏကုဲင်ယင်းအဆုဲင်ꩻသွတ်ꩻတရန်းနောဝ်ꩻ နီဖန်းဖြယ်ချာဗာႏယင်း သတင်ꩻအချက်အဗာႏဖုံႏသွူ။နီကမာꩻဒါႏသုတေသနယို အရပ်ဒေႏသ၊ကွင်ꩻဖုံႏတဗွိုန်တားလို့ဝင်ꩻတဲင် နီအခွဲးအကျုံႏတွမ်ႏဝွေꩻသီးအခွဲးအကျုံႏအလင်ဖုံႏ တဗွိုန်တဝ်းလို့ဝင်ꩻတဲင် နီသတင်ꩻအချက်အဗာႏဖြယ်နယ်ချာလိုꩻလင်ဖုံႏ၊ဝင်ꩻတဲ့နောဝ်ꩻစားနေနေသွူ။ နီထွိုင်ႏဖန်းဖြယ်ချာဝင်ꩻတဲင် လိုꩻလင်ဖုံႏလရွိမ်းနီ သတင်ꩻအချက်အဗာႏဖုံႏတဲင် သေချာငါလို့ဝင်ꩻ ကလင်ꩻဒါႏအရပ်ဒေႏသ လိုႏချက်အပ်ဖုံႏတဲင် ကလိုႏစွဲးကမ်းပင်ႏထိုဗာႏ နုဲင်းမုဲင်ꩻကရိုꩻနောဝ်ꩻ အစွိုꩻတစွိုꩻယို သေဗာႏသွူ။