သမဲင်ꩻအထွာအကုဲင်(၃)

အမုဲင်သွံနောဝ်ꩻ သမဲင်ꩻပညာႏသျင်ႏသီး ထူႏတွမ်ႏသွူအဓိပ္ပာယ်ႏတဲင် ဝွေꩻသီးကမော့ဒါႏအဆွုမ်ႏအမော့ယို အမဲဥ်ရိုꩻတမုဲင်ꩻကရိုꩻနောဝ်ꩻ ကွဲးဆွုံꩻဖျတ်လွေꩻသွူ။အောဝ်ႏတဗွိုန်တောဝ်းဝင်ꩻအရွီးအခိုႏအဆွုမ်ႏအမော့ကားကအောဝ်ႏဖုံႏယို  သမဲင်ꩻပညာႏသျင်ႏသီး အွဥ်ႏဗွိုန်ဝင်ꩻအွဥ်ႏငီꩻလို့ဝင်ꩻ ကလွဥ်ဒါႏဆေ့ꩻအာဖုံႏနောဝ်ꩻသွူ။သမဲင်ꩻပညာႏသျင်ႏသီးနောဝ်ꩻ ကထွုမ်ႏထောင်ဒါႏသမဲင်ꩻအရွီးအခိုႏယို ဝွေꩻသီးအတာႏအန္တရာယ်ႏဖေႏကထွာမွိုန်းတဲင် ထေနယ်ဒျာႏအဟဝ်ဖဲ့ꩻကွေႏကွေႏသွူ။သမဲင်ꩻပညာႏသျင်ႏတဖြာꩻသီးအနေႏ ကအောဝ်ႏယူႏဖေႏနောဝ်ꩻ နီလိုꩻသီးဖဝကထွူထိုꩻလဲဥ်းဒါႏအတိတ်ဖုံႏဒျာႏသွူ။သမဲင်ꩻပညာႏသျင်ႏတဖြာꩻတဲ့နောဝ်ꩻ လိုႏသေနာႏလွေꩻငါႏ လိုအလင်ဖုံႏအတိတ်ကို ပွိုးတမုဲင်ꩻဝွေꩻသီးရုဲင်ꩻတသွိုးဗာႏတဖူꩻဖုံႏ မာꩻဗာႏဖုံႏဟောင်း စစွဥ်ႏနောဝ်ꩻစားဖုံႏသွူ။

ကမဲဥ်ရိုꩻနောဝ်ꩻတဲ့ နီလိုꩻသီးတဖြာꩻစီႏ ဖေႏကသေနာႏချာအသမဲင်ꩻဖုံႏယို သမဲင်ꩻပညာႏသျင်ႏသီးခံႏယပ်နမ်း ခံႏယပ်သꩻတဲင် ထွုမ်ႏထောင်ထွားချာဖေႏယင် ပုဂ္ဂိုလ်ႏလိုꩻယံသီး အကျောင်ꩻခရာႏဖုံႏသွူ။