သွဥ်ထူႏသောင်းသောင်းသာသာ

နီသွဥ်းသီးကသွဥ်ထူႏဒါႏ ကားကသွဥ်ထူႏလွေꩻနောဝ်ꩻ အနယ်ꩻတဖူꩻတဲ့နောဝ်ꩻ၊ အမွိုင်တွမ်ႏအယွိုက်ꩻတဲ့နောဝ်ꩻ တဗွိုန်လွတောဝ်း အကွာႏလို့ဝင်ꩻဖုံးသွူ။ကွပ်စွဥ်ႏသွဥ်ထူႏလွေꩻတဲင်တွော့ꩻ သောင်းသောင်းသာသာအောဝ်ႏလွဝင်ꩻသွူ။ကသွဥ်ထူႏဒါႏအမျိုꩻဖုံႏအကို ဖတ်နေးလွူꩻနေးလိတ်တဲ့အောဝ်ႏ၊တွမ်ႏနားနာႏနေးတဲ့အောဝ်ႏ၊လိတ်သွဥ်ခန်ꩻကို ကသွဥ်နေးနောဝ်ꩻစားတဲ့အောဝ်ႏ၊ တွမ်ႏအစွိုꩻ တားလဲ့ တွမ်ႏလိုꩻလောင်ႏလိုꩻလင် ခွုမ်ညီꩻစံႏညီꩻထာꩻမာꩻဖုံႏနောဝ်ꩻသွူ။

နီကအီႏသွဥ်ထူႏထဲင်းယင်းဒါႏ သွဥ်ခန်ꩻစွန်ꩻထီအတသာတဗာႏဗာႏယို ကသွဥ်ထူႏထွူလဲဥ်းတဲ့နောဝ်ꩻ၊ ကအောဝ်ႏသွဥ်ထူႏတွင်ꩻတဲ့နောဝ်ꩻ နီမဥ်ႏခွုမ်စံႏလွဥ်ꩻနေးစားနောဝ်ꩻ နီစွန်ꩻထီယို အီႏထင်ႏကီ အီႏထင်ငါငါသွူ။သွဥ်ထူႏထာꩻကရိုနောဝ်ꩻ ထွာဒျာႏခွုမ်စံႏမာꩻလွဥ်ꩻထွူမꩻ သေနာႏလဲဥ်းသွူတဲ့ အီႏဖြောင်ငါငါယင်း၊ နီအီႏတောင်ꩻစဲင်းစဲင်းယင်းသွူ။

ကသွဥ်ထူႏဒါႏအနယ်ꩻဖုံႏနောဝ်ꩻ သွဥ်ဖေႏယင်းဝင်ꩻ တားလဲ့ သျင်ꩻနယ်ပျꩻနယ်ယင်း ဖန့်ဖြယ်နယ်ယင်းလိုꩻလောင်းလိုꩻလင် ယိုစားဖုံႏနောဝ်ꩻလဲ့ နီသွဥ်းသီးသွဥ်ထူႏမုနေနေဒျာႏသွူ။

သွဥ်ထူႏမုတဗာႏဗာႏယို ကသွဥ်ထူႏထွူလဲဥ်းဒါႏ အကျောင်ꩻခရာႏတမုဲင်ꩻဖုံႏ၊ ကအီႏသွဥ်ဆွိုက်ငါထဲငါးယင်း အကျောင်ꩻခရာႏတမုဲင်ꩻဖုံႏနောဝ်ꩻ ဖေႏကသေဖြောင်တဲင် အခန်ꩻကဏ္ဍငေါဝ်းရီငေါဝ်းဖြေႏယို အရေꩻကီꩻအရေꩻတန်ငါႏနေနေသွူ။

သွဥ်ထူႏသောင်းသောင်းသာသာကရိုꩻနောဝ်ꩻ ဝွေꩻသီးတဲမ်းဖေႏနေးတွမ်ႏအချက်ဖုံႏသွူ။ အချက်နောဝ်ꩻ အောဝ်ႏ(၉)ချက်...........

• ကသွဥ်ထူႏထွူလဲဥ်း အကျောင်ꩻခရာႏနုဲင်းမုဲင်ꩻစားဖုံႏ ကရိုꩻနောဝ်ꩻ မာချာဗာႏငေါဝ်းရီ။

• နီတသေနာႏတောဝ်းဒွိုန်း၊ ပေါင်းဖြောင်ငါႏတောဝ်းဒွိုန်းအ‌‌‌‌ကျောင်ꩻခရာႏမုဲင်ꩻတရိုꩻတောဝ်း ထေဗာႏမာꩻဗာႏငေါဝ်းရီ။

• နီကသွဥ်ထူႏဒါႏ အကျောင်ꩻခရာႏတမုဲင်ꩻဖုံႏနောဝ်ꩻ ယူႏစဥ်ꩻစာꩻဝွေႏဖန်ႏဗာႏ။

• နီကသွဥ်ထူႏထွူလဲဥ်းဒါႏ အကျောင်ꩻခရာႏတမုဲင်ꩻဖုံႏနောဝ်ꩻ ဖေႏကသေနာႏလွဥ်ꩻ၊ ဖေႏကစဲင်းနောဝ်ꩻ ကျိုꩻစာꩻလွူꩻထွားဗာႏ။

• နီထူႏခါꩻမတ်ခါꩻဗာႏ မတ်တန်ꩻ၊ မတ်စု၊ သက်သေႏသာဓကနေးစားသွူ။

• အစွိုꩻတစွိုꩻ တားလဲ့ လိတ်သွဥ်ခန်ꩻကို အုံကွံတွိုင်ႏပင်ႏခိန်ႏခါႏ နွို့ပါသော့ညီꩻဗာႏ။

• မဥ်ႏမာꩻခန်းထာꩻမာꩻဖုံႏ၊ ရုဲင်ꩻတသွိုးမုဖုံႏ မာꩻညီꩻပါညီꩻသော့ဗာႏအစွိုꩻကို။

• သွဥ်လိတ်အခန်ꩻကို အွဥ်ႏထွူထိုꩻဗာႏတောဝ်း အထန်ႏသွဥ်ထူႏမုဖုံႏလဲ့ သွဥ်သွုပ်လွူꩻဆွိုက်ယင်းဗာႏ။

• နီကသွဥ်ဒါႏ အကျောင်ꩻခရာႏနုဲင်းမုဲင်ꩻစားဖုံႏနောဝ်ꩻ ဖတ်ထွားချာ၊ လွူꩻထွားချာနောဝ်ꩻ သွဥ်ထူႏသောင်းသောင်းသာသာသွူ။

ကမဲဥ်ရိုꩻဒါႏ သွဥ်ထူႏသောင်းသောင်းသာသာကရိုနောဝ်ꩻ နီသွဥ်းသီးကတူႏကို ကျံႏစယ်ႏယူႏဗာႏ၊ ထေထန်ႏဗာႏအကျောင်ꩻခရာႏ ဖေႏကလꩻအချက်၊ ဖေႏကသေနာႏ ဖေႏကမတ်တောင်ꩻနွောင်ꩻတဲ့နောဝ်ꩻ ကျိုꩻစာꩻယူႏ ကျိုꩻစာꩻတဲမ်းဒေါ့ꩻဗာႏ နီကအီႏသွဥ်ထူႏဒါႏ တမုဲင်ꩻဖုံႏနောဝ်ꩻသွူ။ ကအုံနောင်လိတ်အုတ်နောဝ်ꩻတဲ့ မုခ်ဦးပညာႏရေꩻ၊ သွဥ်ထူႏမုစွန်ꩻထီ(Learning Skills) ကျောင်ꩻသားခွုမ်လိတ်အုတ်၊ လိတ်မဲ့ငါ(၁၁)