အက်စကီးမိုးလိုꩻမျိုꩻ

အက်စကီးမိုးလိုꩻမျိုꩻနောဝ်ꩻ ထွာဒျာႏအမေႏရိကန်ႏဆꩻနောဝ်ꩻဖဲ့ကနေဒါကိုသွူ။အက်စကီးမိုးလိုꩻမျိုꩻနောဝ်ꩻ ထွာဒျာႏကနေဒါခမ်းရင်ꩻသားအစွိုꩻဒျာႏနေနေသွူ။ဝွေꩻသီးကအုံႏနောဝ်ꩻ အဝ်ႏဗော့ꩻတွမ်ႏအခွꩻသွတ်ꩻသမုဒ္ဒရာႏ,ထီခြောင်တွမ်ႏသမုဒ္ဒရာႏခွဲးဝင်ꩻခင်ႏလမ်ႏတဲင် အဝ်ႏဒင်ႏကြွန်ꩻဟံႏလောင်းသွူ။ဝွေꩻသီးကအုံဒါႏအရပ်နောဝ်ꩻ ရာႏသီႏဥတုတဲ့အခွꩻမွေးမုဲင်းနေးစွဉ်ႏထာꩻပနေင်ႏနေင်ႏသွူ။ထွာဒျာႏအကြဲင်ႏမော့ဒေႏသရာႏသီႏသွူ။ဝွေꩻသီးကတွူႏတရန်ဖဝတဲ့ ယပ်ꩻခုဲင်ႏမွေးစွဉ်ႏထာꩻသွူ။အက်စကီးမိုးလိုꩻမျိုꩻကအုံကနေဒါခမ်းနောဝ်ꩻရညလဲဉ်းအနေင်ႏလစ်ꩻရေင်လဲဉ်းသွူ။ဝွေꩻသီးတဲ့အဝ်ႏသေဒျာႏ ဝွေꩻသီးဟံႏကောင်ခြောင်ႏနဝ်ꩻအဟဝ်ထွူတဲင် ဖေႏကလွောက်ꩻဖက်လွေꩻတဲင် သွုံꩻဒျာႏတွမ်ႏဝွေꩻသီးထာꩻသေတရာꩻတဲင် ခေတ်အဆွိုက်ဆွိုက်အစွိုးတကုဲင်ထိုꩻတဝ်း လိုꩻမျိုꩻတမျိုꩻတန်ဒျာႏနေနေသွူ။ အက်စကီးမိုးလိုꩻမျိုꩻနောဝ်ꩻ ရိုꩻကီအဝ်ႏဗော့ꩻ ခင်ႏလမ်းနောဝ်ꩻစားတဲ့ ထာꩻသေတရာꩻဖဲ့ꩻနောဝ်ꩻ ထင်ႏထိုတန်နေနေသွူ။ဖြွမ်းဗူႏလွောင်ႏဗူႏတန်လို့ဝင်ꩻတဲင် စွန်ꩻအာႏသန်အာႏတလာတန်လိုꩻမျိုꩻဒျာႏသွူ။သိပ္ပံႏပညာႏသျင်ႏသီး ကထောင်ထွားမော့ꩻနောဝ်ꩻ တညငါႏတဝ်းဒွိုန်းတဲင် ဝွေꩻသီးဒင်ႏမတ်တန်ꩻနောဝ်ꩻ ကမ္ဘာႏဦꩻအရီးသွတ်ꩻအသက်ဆွာꩻသွတ်ꩻလိုꩻမျိုꩻဒျာႏအကျောင်ꩻ ဖောႏနယ်ထန်ႏနဝ်ꩻစားတဲ့ သေထွꩻဗာႏဒျာႏသွူ။

အက်စကီးမိုးလိုꩻမျိုꩻဒေႏသခင်ႏလမ်း

ဝွေꩻသီးကအုံဒင်ႏဒါႏဟံႏတန်ပထဝီႏနောဝ်ꩻ ထီခဲꩻတွမ်ႏဝဖုံႏယို အဝ်ႏဒို့ꩻလွံႏခါꩻစွဉ်ႏစွုမ်ႏနေင်ႏနေင်ႏသွူ။ကွပ်နဝ်ꩻမꩻ ဝွေꩻသီးနောဝ်ꩻဆို့ꩻသေင်ႏမွူးဝါႏမွူးဖုံႏတဲ့ တဒေါ့ꩻလꩻတောဝ်းသွူ။ကွဲတွော့ ဝွေꩻသီးဒေႏသနောဝ်ꩻ တွမ်ႏသဘာႏဝသောင်ရင်ꩻတဲ့ ပျောႏသွင်ႏခရာႏတန်နေနေသွူ။တွမ်ႏဝွေꩻသီးထာꩻယူႏထာꩻထီႏတဲင် ပွုံႏဖောႏလွေခင်ႏလမ်းအုံဖုံႏနောဝ်ꩻ အလွောက်ꩻဖက်ငါႏတရေꩻတင်ႏတယ်ႏငါႏသွူ။ဟောလီဝုဒ်သားအစွိုꩻတဲ့ အဝ်ႏလွဉ်တွယ်ꩻဇာတ်ကာꩻဖုံႏတဲ့အဝ်ႏသွူ။ဝွေꩻသီးအရပ်ဒေႏသနောဝ်ꩻ ဖန်ဆင်ꩻတရေꩻအီဒျာႏတွမ်ႏ အသောင်အရင်ꩻဖုံႏဒျာႏသွူ။

အက်စကီးမိုးလိုꩻမုအုံအဝ်ႏလွူးနမ်း

ဝွေꩻသီးလွူးနမ်းကမ်းကြိုနောဝ်ꩻ အုံနောင်လွေꩻဒျာႏ ထွုမ်ႏထာꩻသောင်ꩻထာꩻသားဖုံႏတွမ်ႏ တခွေထပေႏဖုံႏ ခွိုင်းကအဝ်ႏလိုႏနဝ်ꩻသွူ။ဝွေꩻသီးဆွမ်ꩻသွူထပေႏဖုံႏတွမ်ႏထီကိုသတ္တဝါႏဖုံႏနောဝ်ꩻ အဗွိုန်စွဉ်ႏနေးဝေလထပေႏဖုံႏ အတန်မွေးထာꩻသွူ။ဝွေꩻသီးကထွုမ်ႏမာꩻသီးထာꩻသားတဲ့ ခီတွမ်ႏဖိုးထီးဖုံႏသွူ။တိရစ္ဆာန်ႏအပီဖုံႏတဲ့နောဝ်ꩻ၊အဆွတ်ꩻဖုံႏတဲ့နောဝ်ꩻ တွမ်ႏထာꩻသားအလင်ဖုံႏ မာꩻအီလုဲင်ႏတေား ဝွေꩻသီးအကွဉ်အကꩻဆဲင်ꩻခွမ်ꩻလာꩻဖုံႏသွူ။ဝွေꩻသီးကွဉ်ကꩻထွုံꩻစံꩻနောဝ်ꩻ ကꩻဒွိုန်တန်ခွမ်ꩻလာꩻထွူတဲင်မာꩻဒျာႏအပီတဲင် ရဲးကမ်းခါꩻထာꩻခွꩻအစွူႏဓာတ်နောဝ်ꩻသွူ။ဆဲင်ꩻခွမ်ꩻလာꩻနောဝ်ꩻစားနောဝ်ꩻ အဒို့ꩻဗိဉ်ႏနွောင်ꩻစွဉ်ႏဝွေꩻသီးနမ်းတဗာႏလိုမ်းသွူ။ ဝွေꩻသီးလိုꩻမျိုꩻဆွမ်ꩻထပေႏထီခဲꩻဆꩻလꩻနောဝ်ꩻ အကေႏမွေးစွဉ်ႏထာꩻသွူ။လွေꩻချာလွေꩻငါထာꩻထီခဲꩻလောင်းနောဝ်ꩻ ထွဉ်ႏဒျာႏထွီႏငင်ꩻနေးသွူ။အက်စကီးမိုးလိုꩻမျိုꩻနောဝ်ꩻ တယ်ႏဆို့ꩻလမ်းနောဝ်ꩻ အွတ်ꩻအနေႏနောဝ်ꩻသွုံꩻဒျာႏတွမ်ႏထီခဲꩻသွူ။ ဝွေꩻသီးလိုꩻမျိုꩻတဲ့ တွမ်ႏသဘာႏဝသောင်ရင်ꩻအုံအဝ်ႏလွေꩻငီႏတရျားဒျာႏသွူ။ ကထွိုင်ႏတွိုႏလွဉ်အနေင်ႏငတ်ꩻဆီနောဝ်ꩻ ဝွေꩻသီးပြောင်ꩻလုဲင်ႏနွောင်ꩻစွဉ်ႏဝွေꩻသီးဖဝဖုံႏသွူ။တွမ်ႏနုဲင်ႏငံႏတန်အလင်ဖုံႏ ဆွုပ်သွယ်ႏလို့ဝင်ꩻတဲင် ပြွူႏဖြိုထင်ႏထိုရေꩻဖဲ့ကထွာဒါႏ မော်တော်ဖြီ၊မိုဘိုင်းဖုန်း၊တယ်လီဖုန်း တွမ်ႏကွန်ပျူတာဖုံႏသွူ။လိုꩻကိဉ်းအာအာတဲ့ အလမ်းဖုံႏအဝ်ႏတိဉ်ႏမယ်ꩻလွဉ်ရောင်သွူ။ထာꩻသားဖုံႏယိုကဆွမ်ꩻလꩻနောဝ်ꩻ ဆာဖတဖဲ့ꩻတဲင် တဖဲ့ꩻအံႏတဲ့အံႏ ရွဉ်နွို့တာႏတဲ့ စုလွဉ်နွောင်ꩻသွူ။