အသက်မွန်ဗန် ဆွိုက်သံႏရေꩻ

နီကအောဝ်ႏနာႏနေးတဲ့နောဝ်ꩻ နီကဟွိုန်နေးတဲ့နောဝ်ꩻ အဗွိုန်နေလို့ဝင်ꩻဟေင်း။ ကအောဝ်ႏနာႏထာꩻဖုံႏနောဝ်ꩻ ဆွိုက်သံႏရေꩻတဗာႏတွိုႏသꩻအီအတာႏ ပရေꩻတန်မွေးငါႏသွူ။ပမာႏဗွိုန်နုဲင်း သွဥ်ထူႏထာꩻနေနေ၊ ကအောဝ်ႏနာႏထာꩻယို ဖေႏကသေနာႏပြဲ့ꩻပြဲ့ꩻစွုံႏစွုံႏ၊ဖေႏကလꩻလွေꩻ ဝွေꩻသီးကမဲဥ်ဖေႏသေဒါႏ အကျောင်ꩻခရာႏတမုဲင်ꩻဖုံႏ လိုႏနာႏနေးနောဝ်ꩻစားသွူ။နီဟွိုန်နေးကွို့ꩻငေါဝ်း လိုꩻပုဂ္ဂိုလ်ႏတဖြာꩻဖြာꩻဒေါ့ထာꩻ နုဲင်းနောဝ်ꩻစားနောဝ်ꩻ တထွာနွောင်ꩻတောဝ်း အသက်မွန်ဗန် ဆွိုက်သံႏရေꩻသွူ။ယလဲင်ႏလဲင်ႏနီလိုꩻသီးတန်ဖုံႏယို ကအောဝ်ႏနာႏဒါႏ ပုဂ္ဂိုလ်ႏတဖြာꩻဖြာꩻ ကအောဝ်ႏဒေါ့ဖြောဝ်ႏထာꩻအခိန်ႏတောႏတွင်ꩻကိုနောဝ်ꩻ ဝွေꩻသီးစဥ်ꩻစာꩻယူႏချာကွို့ꩻနမ်းတွမ်ႏနမ်းလွုမ်ꩻ ခွေအီႏဒေါ့ꩻဖြောဝ်ႏဗာႏ နုဲင်ꩻမုဲင်ꩻစားယို ထွာနာႏဖေႏတောဝ်း ကအောဝ်ႏဒေါ့ꩻထာꩻသားအလောင်းသွူ။ဝွေꩻသီးမဥ်ႏမာꩻယိုစားနောဝ်ꩻ လိုꩻလင်ꩻတဖြာꩻအတာႏ တထွာအီတောဝ်းအသက်မွန်ဗန် ဆွိုက်သံႏရေꩻသွူ။ အသက်မွန်ဗန်ဒါႏ ဆွိုက်သံႏရေꩻတဗာႏယို ကအောဝ်ႏလိုႏဒါႏနောဝ်ꩻတဲ့ အဗွေဗိတ်တဗာႏလိုႏယွုမ်းအံႏငါႏဝွေꩻသီးတဲင် အွဥ်ႏစုဗာႏအာႏရွုံႏစွူစွူ၊ အွဥ်ႏသꩻပါပါနာႏခံႏဖေႏ ဝွေꩻသီးကဒေါ့ꩻဒါႏ အကျောင်ꩻခရာႏဖုံႏနောဝ်ꩻသွူ။

အသက်မွန်ဗန်ဆွိုက်သံႏရေꩻအကို ကပါသော့ဒါႏ အနယ်ꩻဗျူဟာနောဝ်ꩻ.......... • ကအောဝ်ႏဒေါ့ꩻထာꩻသားယို ဝွေꩻဒေါ့ꩻလွေꩻ၊ ဖြောဝ်ႏလွေꩻအကျောင်ꩻတမုဲင်ꩻ၊ အခရာႏတမုဲင်ꩻကရိုꩻနောဝ်ꩻ ယူႏစဥ်ꩻစာꩻလွဥ်ꩻထွူဗာႏ။

• ကဆဲင်ႏရာꩻဝွေꩻကဒေါ့ꩻငေါဝ်းယို မဥ်ႏရီလွဥ်နောဝ်ꩻ ပြန်ႏချာဗာႏ၊ လောဝ်းနယ်ချာဗာႏဝွေꩻငေါဝ်းသွူ။

• တွမ်ႏငေါဝ်းဒေါ့ꩻလောဝ်းချာနေးတောဝ်းတဲင်တွော့ꩻ(ထောက်ႏခံႏဝွေꩻအနေႏတဲင် ငေါက်နယ်ကတူႏ၊ဖေႏဝွေꩻကယွုမ်းအံႏချာဝွေꩻနမ်းသတ္တိ အစွန်ꩻတဲင် ထွားဗာႏဝွေꩻအောဝ်ႏဒေါ့ꩻထာꩻ၊တွမ်ႏမဲ့ယိုတဲ့ ထွားစွူစွူဗာႏဝွေꩻ)။

• သသျုတ်ꩻသတရေင်ဒါႏအမျိုꩻ၊ အာႏရွုံႏလွင်းညာꩻထိုꩻအလင်ဖုံႏယိုနောဝ်ꩻ လိုႏဖေႏထွာတောဝ်းနုဲင်းနောဝ်ꩻ၊ မဥ်ႏထွာခန်းတဲ့ မာꩻပွုံႏမသေဗာႏ။

• ကအောဝ်ႏဖေႏဒါႏစားယို ရီဖေႏဗာႏငေါဝ်းရီ။

• ဝွေꩻကဒေါ့ꩻလွေꩻလဲဥ်းဒါႏ အကျောင်ꩻခရာႏဖုံႏယို တွမ်ႏနီကသေထွꩻ ကသေခါꩻဒါႏအတွိုင်ꩻ စဲင်ဆေꩻဒေါ့ꩻလောဝ်းပြန်ႏချာဖေႏဗာ။

• ဒေါ့ꩻလွေꩻလဲဥ်းဒျာႏအကျောင်ꩻခရာႏ တမုဲင်ꩻခိဖုံႏနောဝ်ꩻ ထူႏခါꩻမတ်ခါꩻဗာႏ မတ်စုကို။

• ဝွေꩻဒေါ့ꩻထွူထိုꩻလဲဥ်းဆꩻချာဖဲ့ꩻနောဝ်ꩻ ဝွေꩻကဒေါ့ꩻလွေꩻအကျောင်ꩻခရာႏဖုံႏယို ဖေႏကသေနာႏထွꩻလွဥ်ꩻနောဝ်ꩻ ကျံႏစယ်ႏယူႏစဥ်ꩻစာꩻဝွေႏဖန်ႏဗာႏသွူ။

• တွမ်ႏစေႏလာႏ တားလဲ့ တွမ်ႏငေါဝ်းနေးတဲင် ဒေါ့ꩻဖေႏအာႏဗာႏဝွေꩻ၊ တဲမ်ႏဖေႏဗာႏအနယ်ꩻ ဖေႏကယိန်းယံယံ ပင်ႏတသွောင်းထိုꩻဗာႏဝွေꩻသဓာတ်သွူ။

ကမဥ်ရိုꩻဒါႏ အသက်မွန်ဗန်ဒါႏဆွိုက်သံႏရေꩻတဗာႏယိုနောဝ်ꩻ ဝွေꩻအောဝ်ႏဒေါ့ꩻငေါဝ်းခိန်ႏတွင်ꩻ၊ နီမဥ်ႏဒေါ့ꩻခိန်ႏနောဝ်ꩻတဲ့ တဖဲ့ꩻတွမ်ႏတဖဲ့ꩻ တဖြာꩻတွမ်ႏတဖြာꩻ လိုႏအွဥ်ႏရေꩻဖေႏငါႏလို့ဝင်ꩻသွူ။

ကအုံနောင်ဒါႏလိတ်အုတ် သွဥ်ထူႏမုစွန်ꩻထီ(Learning Skills ),ကျောင်ꩻသားခွုမ်လိတ်အုတ်, လိတ်မဲ့ငါ (၂၀)....